За разлика од гласањето за парламентарните избори на 8 мај кога во Општина Желино во ИМ 2101 во селото Ларце излегле на гласање 479 гласачи, вчера, на прегласувањето, на гласање излегоа значително повеќе – 550 избирачи
На 8 мај, коалицијата „Европски фронт“ предводена од ДУИ освои 134 гласа наспроти 332 кои ги освои коалицијата „Вреди“. Вчера, „Европски фронт“ падна на 48 гласа, а „Вреди“ скокна на 494. Доволно за ниво на Изборната единица 6 „Европскиот фронт“ да загуби, а „Вреди“ да добие еден пратеник
Истрелите од пиштоли и автоматско оружје го означија почетокот на славјето на „Вреди“ за победата на прегласувањето во селото Ларце, општина Желино, која им го донесе 14-от пратеник на парламентарните избори.
Синхронизирано со истерлите, ноќта беше осветлена и од големиот број пиротехнички средства. А славјето не би било целосно без музика, зурли, тапани и славеници кои ги даруваат музичарите. Кандидатот на „Вреди“, Аднан Азизи, не славеше роденден, но доби торта на која имаше слика од него, лидерот на БЕСА, Билал Касами и косовскиот премиер Албин Курти.
Од младо до старо, речиси цело Ларце се собра сретсело за да го прослави триумфот на нивниот соселанец кој успеа да стане осмиот пратеник на „Вреди“ во шестата изборна единица. Вака изгледаше славењето, а што и претходеше на еуфоријата?
Ларце е релативно непознато село за општата јавност. Но, на еден ден стана центар за партиите на Албанците. На прегласувањето „Европскиот фронт“ и „Вреди“ ги вкрстија копјата – првите борејќи се за да останат на 9 пратеници, другите, пак, за да изедначат во последен момент во шестката.
Кои се очекувањата? Ќе биде ли подобро?
Од кај да знам, знаеш колку ме брига… веќе досадно е три пати излагам.
Училиштето „Раметула Амети“ ги отвори вратите трет пат, не за учениците, туку за гласачите. Но, барем во утринските часови, оваа образовна институција повеќе наликуваше на полициска станица.
А внатре, нов избирачки одбор беше задолжен за спроведувањето на гласањето.
„Не знам што беше проблемот од минатиот пат, јас не бев на ова избирачко место, сега денеска се е океј“,
изјави претседателот на избирачкиот одбор, Талат Бекири.
Жителите на Ларце уште од утринските часови, најчесто во групи, пристигнуваа на гласачкото место.
Очекуваме нешто подобро, па ќе видиме.
Не гласав уште, имаше многу жени, па не гласав. Ќе дојдам пак.
-Што очекувате?
Сигурно нешто подобро за селото. За селото, за понатаму не знам што ќе биде.
Убавото време можеби беше дополнителна причина за поголемата излезеност, но сето тоа се смени наеднаш кога темни облаци го покрија Ларце кои донесоа дожд и град.
Откако се стабилизираше временската состојба, групирани во повеќе автомобили, гласачите продолжија да доаѓаат на гласање. Меѓу овие автомобили честа глетка беа регистарски таблички од Германија и Словенија.
Си знаеме ние за кого ќе гласаме, си знаеме.
Јас за прв пат ќе гласам, вчера дојдов од Германија специјално за денеска да гласам.
Јас не бев минатиот пат на гласање, јас бев надвор, но сега има гласачи што излегуваат на гласање.
До крајот на гласањето, се помина во мирна атмосфера.
Дека излезеноста е поголема од 8 мај, беше очигледно уште во текот на денот, но со последниот пресек во 18:30 часот, стана повеќе од јасно дека одзивот ќе биде поголем за речиси осум отсто.
Штом часот чукна седум, со зајдисонце, вратите се затворија, училиштето се заклучи и започна броењето.
Додека внатре се броеше, коалицијата „Вреди“ понесена од големата излезеност, закажа прес-конференција за 20 часот. Пред партискиот штаб се собираа поддржувачи – сите со очекувања за успех.
Треба да влезе, очекуваме.
Се шпекулираше дека победата ќе ја обзнани Билал Касами, кој инаку е роден токму во ова село.
Тоа не знам дали ќе дојде, али ќе победиме сигурно.
Во штабот, парлалено, се слеваа информации за бројот на гласови… најавената прес-конференција беше одложена, што пак предизвика неизвесност кај насобраните.
Но, се испостави дека грижите биле залудни кога од штабот стигнаа првите позитивни сигнали дека „Вреди“ има огромна предност пред „Европскиот фронт“ и дека повеќе од сигурно, Аднан Азизи ќе биде осмиот пратеник на „Вреди“ во шестата изборна единица.
„Поздравете го Артан Груби, поздравете го Али Ахмети. Не се мавај со лакти со село Ларце, не се мавајте со лакти со печалбарите, почитувајте го албанскиот народ бидејќи ние нема да ве оставиме на раат да спиете ни во вашите куќи. Куферот го имаме тука со нас, но ќе видиме кој ќе ја носи торбата за во Хаг“
По овој приврзаник, се обрати и кандидатот за пратеник Аднан Азизи.
„Кога го започнувавме нашето политичко патување, ДУИ секогаш првиот удар го земаше од моето село, а последниот удар за да отиде во опозицијата и да дојде нова ера која достоинствено ќе ги претставува Албанците беше од ова место од ова село“,
изјави Азизи.
За медиумите на македонски се обрати поранешниот заменик-министер за одбрана, Башким Хасани.
„И покрај сите притисоци на началници на полиција, на инспектори и на моменти кога се нудеа и пари за да се гласа, ние овие случаеви од утре ќе ги пријавиме и ќе бараме нивна одговорност“,
вели Хасани.
На прегласувањето, коалицијата „Вреди“ освои 494 гласови за разлика од 332 на 8 мај. Она што зачудува е што минатиот пат „Европскиот фронт“ собра 34 гласа на ова избирачко место, а вчера добија само 48 гласа. По говорите, стигна тортата, а факелите и огнометот му дадоа поинаква боја на селото во ноќните часови.
Во еуфоријата, пукна и првата „пушка“, а охрабрени од неа, следуваа уште неколку рафали, иако меѓу присутните имаше голем број деца.